Category: Óflokkað

Þennan valdi hún sér, skvísan mín hún Freyja Ósk, til að vera fermingarkjóllinn. Við fundum hann í gömlu…..eða ekki svo gömlu Burdablaði. Fyrst höfðum við gengið búða á milli og hún mátað óteljandi kjóla….enginn samt sem hún féll fyrir og að lokum bað hún mömmsuna sína um að sauma fyrir sig. Mamman auðvitað varð ekstra mjúk í hjartanu og var ekki lengi að fara með dísina sína í efnabúð. Í Föndru fann hún þetta efni …

…dásamlega fallegt siffon. Siffonið er gegnsætt og því var nú ljóst að við þyrftum að hafa kjólinn tvöfaldan, þ.e. með öðru efni undir. Hún valdi sægrænt polyester með teygju á alla kanta og þá gat mamman farið í gang. Ég átti innra efnið, slatta af því þannig að ég byrjaði á því að sníða það og setja kjólinn saman – Freyja Ósk er færa sig úr barnastærðum yfir í fullorðinsstærðir og ég var hreinlega ekki viss í hvaða númeri hún væri.

Ég notaði auðvitað gamla, góða kalkipappírinnn við sníðunina, ég er alltaf að sjá það betur og betur hvað hann er betri en krítarnar….eða það finnst mér alla vega 🙂

Ég var nú held ég búin að segja ykkur frá því hvernig ég nota kalkipappírinn, ég legg hann að báðum hliðum efnisins, set svo sniðið ofan á allt saman. Þá tek hér hjólið góða og renni því með köntunum á sniðinu og passa að setja allar merkingar inn – þannig koma merkingarnar báðum megin á stykkið sem sniðið er.

 Að því loknu tek ég allan pappír í burtu – snið og kalkipappírinn, klippi með saumfari og….voilá   Þá var bara að setja kjólinn saman, svona leit hann út komin á Stínu Gínu….ég verð að viðurkenna að ég var ekki alveg viss um að ég hefði gert þetta rétt…

Skringilega stórt gat þarna á bakinu, finnst ykkur ekki? Þarna átti svo eftir að koma snúra til að rykkja gatið saman…

Freyja Ósk mátaði, sniðið passaði og þá var bara að skella sér í siffonið. Ég var svolítið að melta með mér hvernig best væri að haga þessu, Burda talaði bara um eitt efni og því varð ég að spila þetta af fingrum fram. Ég ákvað að festa toppstykkin saman, þ.e. innra og ytra efnið og festa pilsin saman í mittinu…

 Sneið siffonið auðvitað fyrst…

Að þessu loknu leit kjóllinn svona út á Stínu Gínu

Ennþá hálf kindarlegur og mér leist ekkert sérstaklega á blikuna en þegar ég var búin að finna út úr því hvernig ég þræddi snúruna í þá leit þetta allt saman mun betur út. Dísin mín virtist ánægð, eina sem þurfti að gera var að stytta, falda og ganga frá…

Jæja, tíminn leið, kjóllinn frágenginn og fermingin nálgaðist. Freyja Ósk mátaði allra síðustu mátun og við vorum sammála því að það mætti stytta kjólinn örlítið meira – eitthvað dulítið misfórst og kjóllinn varð svona…

Nú voru góðu ráðin aldeilis dýr, kjóllinn allt of stuttur og rétt rúm vika í fermingu. Ég auðvitað tættist í Föndru, leitaði og leitaði, fann svo á endanum eina sem vann þar. Hún sagði mér að efnið væri nú bara uppselt! Ég sagði henni frá verkefninu og þar sem ég stóð þarna, döpur á svip að reyna að hugsa upp lausn á málinu, sagði hún: “Sko, ég keypti restina af efninu, ca. 1,5m, ég gæti komið með það á morgun og látið þig hafa það…”

Ég réðist næstum því á hana til að knús kyssa ókunnuga manneskjuna – þvílíka hugulsemin. Hún sagðist þá muna eftir okkur þegar við keyptum efnið – henni fannst stelpan mín svo flott að velja svona öðruvísi efni í fermingarkjólinn sinn 🙂

Daginn eftir fékk ég svo efnið, sneið og saumaði nýtt pils sem ég festi við toppstykkið og voilá – málinu reddað 🙂 Þessar tvær myndir hér eru eftir snillinginn hann Anton Bjarna – hann er ljósmyndarinn sem tók fermingarmyndirnar. Hér er hægt að sjá meira frá honum, alveg frábær.

Það besta við þetta allt saman að dísin mín er yfir sig ánægð með kjólinn – og ég auðvitað líka – enda finnst mér skonsan mín falleg í öllu 🙂

Takk fyrir mig 🙂

Mér finnst þessi tími svolítið skemmtilegur – þá er ég ekki að meina veðrið. Nei, á þessum tíma, mars/apríl er mikið um veislur, árshátíðir og fermingar.

Jói leikari kom til mín um daginn, hann var að fara að vera veislustjóri á árshátíð og vantaði að láta þrengja buxur. Buxurnar voru nú ekkert endilega mjög algengar karlmannsbuxur…

Jeps, ótrúlegur húmoristi og ekki nóg með buxurnar…þetta eru jakkaföt, jakkarnir í sama lit og buxurnar 🙂 Dásamlegt!

Það var svo sem ekki mikil vinna í þessu, þrengja skálmarnar svo þær væru aðeins meira “up-to-date”.

Hér er svo gaurinn kominn í þær – ég brosi enn þegar ég hugsa um þessi jakkaföt, alveg frábær :

Svo kom hún Steinunn til mín, hún var að fara á árshátíð og skellti sér í að sauma sér kjól með tjulli…svo bara varð hann eitthvað skrýtinn og hún bað mig að hjálpa sér að laga hann.

Hún var ósköp ánægð og gat farið í kjólnum á árshátíðina 🙂

Síðasta verkefnið þessa vikuna var svo fyrir dóttluna mína, hún er að fermast í vor og eftir nokkrar ferðir í búðir að máta kjóla þá bað hún mig að sauma handa sér kjól. Móðurhjartað tók auðvitað kipp af gleði og var ekki lengi að fara með hana í Föndru og kaupa efni. Við keyptum siffon og svo verður annað efni undir því.

Ég komst ekki lengra en að sníða innri kjólinn, hann er úr fallega bláu teygjuefni sem fellur vel og mun koma vel út undir siffoninu.

Ég ætla ekki að segja ykkur meira frá fermingarkjólnum í bili – en ég lofa að koma með hann þegar hann er tilbúinn 🙂

Takk fyrir mig 🙂

Ó mæ, ó mæ hvað tíminn hefur flogið frá mér – það eru tæpar tvær vikur síðan ég setti inn færslu! Síðasta vika var mjög annasöm enda loksins komin á skrið og með fulla orku eftir flensuna. Hamagangurinn kostaði mig svo tveggja daga þreytu – en það er kostnaðurinn við að fara framúr sjálfri mér og kroppnum 🙂

Yfirleitt skipti ég tímanum mínum á saumastofunni jafnt milli Ragga – það er gaurinn sem stýrir fyrirtækinu sem ég sauma fyrir – og minna eigin saumaverkefna. Ég er oftast 1-3klst á saumastofunni á dag, allt eftir því hvað kroppurinn leyfir mér. Ég notaði hins vegar nánast alla vikuna í að sauma fyrir Ragga enda komin með  verulegt samviskubit yfir framleiðslunni hjá mér…eða skort þar á. Lúffur úr íslenskri ull voru á dagskrá.

Ég fæ lúffurnar sniðnar, ég sauma þær saman og sauma svo flíslúffu til að setja innan í. Svona leit sníðaborðið mitt út…

     …og svo þróaðist það í þetta

Þegar lúffurnar eru komnar saman, treð ég flísinni inn í ullina, síðan sauma ég flísina fasta og set snúru – svona til að hafa yfir hálsinn svo maður týni ekki lúffuni sinni.

Samtal urðu þetta 28 pör af lúffum – nokkuð ánægð með vikuskammtinn 🙂 Lúffurnar fara svo út í verslanir og verða seldar þar, ég er ekki að selja þær sjálf.

Takk fyrir mig 🙂

Ermar úr Léttlopa – uppskrift

Jæja, vikan búin að vera alherjar flensa og slappleiki, ég hef ekkert farið í saumahornið mitt og sakna þess alveg ágætlega. Til að horfa á þessa viku með jákvæðum augum þá hafði ég mig í að prjóna smávegis í flensuhangsinu.

Ein af pælingunum á bak við bloggið er að deila með öðrum, uppskriftum og sniðum sem ég hef sjálf hannað og ég er búin að vera á leiðinni að setja inn uppskrift af fallegum ermum úr Léttlopa. Í iðjuleysinu sem fylgdi flensunni skellti ég mér í að fitja upp í ermarnar góðu. Hér kemur svo uppskriftin, það er líka hægt að fá skjalið sent á netfang, það er án mynda.

Ermar – uppskrift S/M og M/L

Garn – Léttlopi, 5 dokkur grunnlitur, 1 dokka litur og glansþráður að eigin vali

Prjónar nr. 4,5 og 6 – sokkaprjónar eða langur hringprjónn

Fremri hluti ermi*

Fitja upp 36/42 lykkjur og tengja saman í hring. Prjóna 1.umf. brugðna og síðan 2 umf. gataprjón.

Gataprjón – prjóna 2 lykkjur saman og slá bandi uppá prjón, síðan 2 lykkjur saman og slá bandi uppá prjón – endurtaka út hringinn. Ein umf. slétt. Endurtaka næstu umf.

Prjóna 15 umf slétt og byrja þá á mynstri sem lítur svona út

Mynstur:

Setja saman hvítan (eða annan lit) og glansþráð (hvaða lit sem er). Prjóna til skiptis 1 lykkju grunnlit og 1 lykkju lit/glansþráð – út umferðina. Prjóna svo aðra umf. og byrja þá fyrstu lykkju á lit.

Prjóna svo 5 umf með grunnlit og byrja þá á tíglunum

• prjóna 2 lykkjur í grunnlit og eina í lit – út umferð
• prjóna 2 lykkjur í grunnlit og eina í lit, 5 lykkjur í grunnlit og 1 í lit – út umferð
• prjóna 1 lykkju í grunnlit og 3 í lit, 3 lykkjur í grunnlit og 3 í lit – út umferð. Prjóna 2 svona umferðir
• prjóna 5 lykkjur í lit og eina í grunnlit – út umferð
• bæta glansþræði við grunnlitinn, prjóna 2 lykkjur í lit, eina í grunnlit með þræði, 2 lykkjur í lit og eina í grunnlit á þráðar (lykkjan á milli) – út umferð
• prjóna 1 lykkju í lit, 3 í grunnlit með þræði, 1 í lit og eina í grunnlit (lykkjan á milli) – út umferð
• prjóna 2 lykkjur í lit, eina í grunnlit með þræði, 2 lykkjur í lit og eina í grunnlit án þráðar (lykkjan á milli) – út umferð. Prjóna 2 svona umferðir
• prjóna 5 lykkjur í lit og eina í grunnlit – út umferð
• prjóna 1 lykkju í grunnlit og 3 í lit, 3 lykkjur í grunnlit og 3 í lit – út umferð. Prjóna 2 svona umferðir
• prjóna 2 lykkjur í grunnlit og eina í lit, 5 lykkjur í grunnlit og 1 í lit – út umferð
• prjóna 2 lykkjur í grunnlit og eina í lit – út umferð

Prjóna 5 umf. með grunnlit og loka svo mynstrinu með því að setja saman hvítan (eða annan lit) og glansþráð (hvaða lit sem er). Prjóna svo til skiptis 1 lykkju lit/glansþráð og 1 lykkju grunnlit – út umferðina. Prjóna svo aðra umf. og byrja þá fyrstu lykkju á grunnlit.

Prjóna með grunnlit þar til ermin mælist 23/25cm, prjóna þá eina umferð og auka út í 3ju hverri lykkju út umferðina.

 Seinni hluti ermi

Skipta á prjóna nr. 6 og prjóna þar til ermin mælist 47/52cm.

Bakið

Prjóna perluprjón fram og tilbaka þar til bakið mælist 50/55cm

Perluprjón: prjónað er slétt og brugðið og í næstu umferð er prjónað brugðið og slétt, þ.e. slétt yfir brugðna og brugðin yfir slétta.

Prjóna efri hluta seinni ermi í beinu framhaldi af bakinu, þ.e. tengt aftur í hring og prjónað slétt þar til ermin mælist 24/27cm. Stykkið lagt til hliðar og frampartur seinni ermi prjónaður á sama hátt og í byrjun*

*Sjá leiðbeiningar hér fyrir ofan 🙂

Slíta frá en skilja eftir góðan spotta til að lykkja saman með.

Lykkjað saman

Leggja prjónana saman, þ.e. prjón frá fremri hluta ermi að prjón efri hluta erminnar þannig að ermahlutarnir tengist.

Þræða grófa nál með góðum enda af fremri hluta af seinni erminni. Þræða með nálinni ofaní fremstu lykkjuna, takið hana fram af prjóninum og svo upp í næstu lykkju (sem nú er orðin fremst á prjóninum) – gera það sama á prjóninum á móti. Endurtaka þetta koll af kolli þar til allar lykkjur hafa verið tengdar saman.

Svona sýnir prjónablaðið lykkjun

Ganga frá endum, hekla fastahekl í jaðarinn á bakinu með grunnlit og framan á ermunum með glansþræði.

Svona lítur þetta svo út

Skolið og leggið til þerris!

Hér eru svo ermarnar, seldi alveg slatta á þeim á sínum tíma og tek við pöntunum fyrir þær sem ekki hafa áhuga á að prjóna sjálfar 🙂

Góða skemmtun við prjónaskapinn, mér þætti voða vænt um að heyra frá ykkur, hvort sem þið hafið prufað ermarnar eða hafið athugasemdir við uppskriftina…eða annað 🙂

Takk í dag 🙂

Undanfarið hefur verið mikið að gera hjá mér, bæði í að afgreiða pantanir á kjólunum mínum, og í að vinna við prototypu fyrir fyrirtækið sem ég sauma fyrir. Ég ákvað því að gefa mér tíma til að sauma kjól handa sjálfri mér. Mér finnst öll efnin mín svo falleg og mig langar að sauma mér flíkur úr þeim öllum. Spenningurinn fyrir tilraunastarfsemi með ullarefnin varð öðru yfisterkari og því ákvað ég að sauma mér kjól úr ullarefni.

Úr ýmsu var að velja…

Ég valdi þetta, fallega yrjótt með lituðum yrjum innan um þetta svarta og hvíta. Mig langaði að prófa að nota ullarefni í sams konar kjólastíl og ég hef verið að gera, þ.e. nota sama góða sniðið. Til þess að það gangi upp, þ.e. sleppa rennilás og mittissaumum þá ákvað ég að setja prjónaefni í hliðarnar. Ullarefnin hef ekki teygjueiginleika þannig að sniðið góða hentar ekki nema að hafa eitthvað teygjanlegt á móti.

Þetta efni setti ég í hliðarnar á kjólnum, ermar og kraga.

Miðjan sniðin úr ullarefni…

…og hliðar úr prjónaefni.

Svona er svo útkoman…

Mér finnst hann æðislegur, hann er mjög þægilegur með prjónaefni svona í hliðum og í ermum. Hann kemur líka sérstaklega vel út á kroppnum því einlitt í hliðunum einfaldlega grennir þegar sniðið er svona.

Þar sem ég er voða viðkvæm fyrir ull – og grunar að ég sé ekki sú eina – þá mun ég örugglega fóðra kjólana sem ég á eftir að sauma úr ullarefnunum.

Takk fyrir mig 🙂

Mér finnst ég vera ótrúlega heppin að hafa uppgötvað þessa getu mína til að sauma. Ég hef eins lengi og ég man eftir mér, haft áhuga á líkamanum; hvernig hann lítur út, hvers vegna hann lítur út eins og hann gerir, mismunandi líkamsgerðir og svo auðvitað, hvernig hann virkar. Í mörg ár var líkamsræktin efst á líkamsáhugasviðinu, ég stundaði íþróttir af miklum móð, vissi hvernig gott var að næra kroppinn og hvernig hann brást við líkamlegu álagi. Ég lærði að verða íþróttakennari og kenndi þolfimi í nokkur ár. Ég var svo byrjuð í einkaþjálfaranámi hjá Fimleikafélagi Danmerkur og hugði á langt og árangursríkt starf innan þess geira.

Örlögin gripu hins vegar í taumana, með tímanum fjaraði íþróttabröltið út og áhugi á annarri starfsemi líkamans tók við. Í dag elska ég að “skoða” fólk, velta fyrir mér mismunandi líkamsgerðum og finnst gaman að sjá hvernig hver líkamsgerð hefur sínar fallegu hliðar             

Með saumaáhuganum læri ég svo alltaf eitthvað nýtt í sambandi við hvaða snið henta hverjum kroppi

Upphaflega saumaði ég bara á sjálfa mig og var svo þakklát fyrir þá getu. Mér finnst gaman að vera öðruvísi og er ein af þeim sem á oft erfitt með að finna föt á mig í búðum. Þau eru ýmist of þröng yfir lærin eða of víð í mittið, skálmar/ermar of stuttar og síðast en ekki síst, mittið á röngum stað! Það var því mikið gaman að geta saumað fötin á mig sjálf.

Burdablöðin voru bestu saumavinir mínir í byrjun, var áskrifandi af þýsku útgáfunni og þannig lærði ég að taka upp snið…

Í dag geri ég mín eigin snið, er nú samt ekki búin að meistra það að mæla upp og búa til þannig snið – en eins og tískan er í dag, þá teikna ég sniðin mín sjálf 🙂

Ég fylgist smávegis með tískustraumum á Burdastyle.com og svo finnst mér gaman að skoða Tinker Taylor. Annars finnst mér skemmtilegast að vera öðruvísi en aðrir og er alfarið á móti hjarðhegðun hjá fólki, hvort sem er í fatavali eða heimahönnun.

Draumurinn er að hanna og búa til mín eigin “alvöru”snið, þ.e. snið þar sem tekin eru mál af kroppnum og sniðið teiknað eftir þeim. Ég skrifaði um Lutterloh aðferðina um daginn og næsta skref er Pfaff…

Þessa dásemd átti systir mín, ég fékk hana svo eftir hennar dag, en í þessu eru sem sagt komplett leiðbeiningar að því, hvernig maður tekur kroppsmál og býr til snið

– hlakki, hlakki til 🙂

Þangað til mun ég njóta þess að búa til eitthvað fallegt, úr því sem ég á og með þeim aðferðum sem ég kann – með ást og umhyggju, fyrir alla þá sem njóta vilja!

Góðar stundir 🙂

Vikan í saumahorninu er búin að vera frekar þreytt hjá mér, líklega vegna anna síðustu viku – tek svona annasömum vikum fagnandi en greiði stundum fyrir þær með þreyttum kroppi. Mér finnst ég hafa gert ósköp lítið en er nú samt búin að sauma ca. 25 pör af ullarlúffum og stytta tvennar buxur. Það er nú alveg ágætis vinna – held ég sakni bara kjólanna minna 🙂

Mig hefur lengi langað að búa til mín eigin snið, þ.e. eftir líkamsmáli. Ég hef skoðað aðeins í kringum mig og svo virðist sem ég þurfi að fara í fatahönnun “all in” til að læra sníðagerð, þð virðist ekki vera hægt að taka bara sníðakúrs. Ég hef ekki haft áhuga á fullu námi, þannig að þegar Virka auglýsti ókeypis sníðanámskeið í haust þá var mín sko ekki lengi að skrá sig. Mætti svo spikspennt með möppuna og blýant.

Þar var Herra Lutterloh sjálfur kominn að kynna sníðakerfi sem amma hans hafði hannað fyrir mörgum árum. Sniðið byggir á þeim kenningum að kroppurinn er alltaf í réttum hlutföllum, sama hvert vaxtarlagið er, t.d. er höfuð og háls 1/8 af hæð líkamans, framhandleggur jafnlangur il o.s.frv. Út frá þessum kenningum er nóg að taka tvö mál, þ.e. brjóstmál og mjaðmamál og voilá, hægt að búa til snið. Hér eru frekari upplýsingar um Lutterloh sníðakerfið.

Þetta finnst mér alger snilld og er búin að bíða spennt eftir að gefa sjálfri mér tíma til að gera flík eftir þessu kerfi. Um daginn skellti ég mér í verkið.

Þennan bækling fékk maður frítt með, þetta er grundvöllurinn til að geta búið til sniðið. Búið er að setja inn tölur sem maður á svo að fylgja miðað við eigin mál. Í bæklingnum eru snið til að gera skyrtu, vesti og buxur. Persónulega finnst mér flíkurnar doldið halló en ég er nú bara þannig að ég þarf að gera eitthvað oggu öðruvísi og ákvað því að gera kjól. Það ætti ekki að skipta máli, axlar-, mittis- og mjaðmamál gilda líkt og í öðrum flíkum 🙂

Við fengum líka svona kvarða sem ég plastaði stífan og límdi framan á málbandið mitt. Á honum eru líkamsmálin og maður teiknar punkta í hlutfalli við málin…smá flókið að útskýra en t.d. eru mín mál B102 og M110. Þegar ég geri efri búk, þá festi ég pinnan á málbandið þar sem stendur 102 og festi það svo á X á sniðinu. Síðan eru ákveðnir punktar gefnir og tala við þá sem segir hve marga cm á að hafa að punktinum á sniðinu. Svona fer maður hringinn, punkt fyrir punkt…þetta skýrist 🙂

Síðan var næsta skref að teikna sniðið upp, passa þarf að hafa örugglega nógan pappír. Ég festi sníðapappírinn á korktöflu sem ég á því…

…á pappírinn nælist bæklingurinn – með sniðinu sem á að nota, og síðan nælist málbandið/kvarðinn á réttan stað á sniðinu (sjá X á miðju bakstykki)

Og þá er ekkert eftir nema að teikna sniðið…

Hér þarf nákvæmni, skrá punktinn réttu megin við málbandið og auðvitað skrá punktinn á hárréttan stað. Þegar búið er að skrá punktana, þarf að tengja þá með línu og síðan klippa út.

Þetta gerði ég svo fyrir bak- og fram stykkið og svo auvitað ermar. Ermarnar eru í raun bara handvegurinn, síddin skiptir ekki máli.

Ok, þá var komið að því að sníða efnið. Ég auðvitað mátaði fyrst sniðið við sjálfa mig – eins og segir í leiðbeiningum – og merkilegt nok, það virtist passa, aðeins of vítt en líklega rétt miðað við skyrtusnið 🙂

Ég valdi svart bómullarefni sem er með teygju til verksins…

…og svo bara að setja allt saman – klikkaði alveg á því að taka myndir af sníðaferlinu 🙁

Svona snið er með brjóstsaumum og mittissaumum. Það er talað um að bíða með að gera mittissaumana þangað til búið er að setja flíkina saman og máta – mjög lógískt. Það getur verið vandasamt að sauma svona föll þannig að ég títa þau alltaf niður áður en ég sauma þau. Fyrst þegar ég byrjaði að sauma þræddi ég, mamma kenndi mér það, það er trúlega betra…ég reyndar geri það á vandasamari flíkum…

Svo þegar ég saumaði hliðarnar saman, ákvað ég að láta brjóssauminn liggja niður. Mamma hefði sagt mér að strauja…en ég sleppti því og afsaka mig með því að þetta er tilraunaflík :Þ

Jæja, búin að setja saman og kominn tími til að máta…það verður að fylgja hér með hvað það er fyndið að vera ein og ætla að taka myndir að flíkinni frá sem flestum hliðum. Læt hér fylgja myndaröð og eins og sjá má þá hitti ég nú ekki alltaf á flíkina…

Ég get ennþá hlegið að speglinum, hálsinum og öllu því sem ekki á að koma þarna fram 🙂

Niðurstaðan er sú að þessi sníðaaðferð virkar, hér notaði ég skyrtusnið þar sem miðað er við óteygjanlegt efni og því víðar ermar og búkur. Það þarf auðvitað að aðlaga hverja flík sniðinu. Hvort það er einfaldlega betra að kaupa sníðabók frá þeim eða aðlaga sjálf…leyfi þeirri pælingu að hanga 🙂

Næsta skref – skoða fleiri sníðaaðferðir, tískan eins og hún er í dag á eftir að breytast og ég vil kunna að gera kroppsniðinn kjól frá grunni!

Takk í dag 🙂